Central HighTea 1.0 Code by ManInNet
Edit by : cell_kk -
希臘問題暫時解決，美股在關鍵位置爭持。持續了7個月的援助希臘談判終告完成，一如所料，希臘贏得了1300億歐元援助貸款救急，雖然希臘債務問題遠未能完全解決，但總算暫時免除了破產的危機。不過歐洲股市卻未有因好消息炒上，反而掉頭回軟，結束了連續四日的升勢。好消息回吐，德法股市回軟0.2%及0.3%，希臘股市跌幅更顯著，下挫3.5%。
美股杜指早段受希臘債務危機舒緩刺激，一度上破13000點大關，升上2008年5月以來高位，但在高位橫行一段時間就掉頭下滑，倒跌23點才重拾升軌。收市報12966點，微升16點，標普500指數漲不足1點，收1362點。杜指期最新報12941點，較收市高2點。
港股美國預托證券回落，港股ADR指數報21288點，比香港收市低171點或0.8%。匯控報70.79元，比香港低1.3%，中移動靠稱，收81.4元，比香港低0.1%。
中國開始放水刺激經濟，希臘危機暫時告一段落，歐盟今個月尾又計劃再大規模供水俾銀行，估計可能去到1萬億歐元咁誇張，咁多錢流入市場，風險資產水漲船高。金銀銅等齊齊抽高，杜指表現最好的兩隻成份股亦係美鋁（Alcoa）及油股Chevron。當中油價走勢更係市場的關注點，紐約原油昨日一度突破每桶106美元高位。分析普遍認為，全球經濟轉趨穩定，熱錢橫流，加上伊朗同美歐關係緊張，影響供應，油價勢將繼續向上，令通脹再度成為經濟復甦隱憂。
美股技術分析師話，美股去到關鍵時刻，不要只睇杜指，標普500指數顯示的走勢略弱。如看杜指，杜指連續三次試穿13000點，高見13005點，日中已穿13000點大位，是08年5月以來首次，最後收市回到13000點樓下。不過美股交易員叫大家留意下標普500指數，標普500成份股較多，代表性更廣泛，標普500指數昨日未穿到去年5月的高位1370點，標普能否大幅升穿這個關鍵位再向上，是市場的焦點。
但分析員Guy Adami對CNBC話，佢有啲擔心標普有無動力再上，市場上有些徵兆似乎被忽視了，好多股份正在造一個雙頂，以機械股Catepillar為例，一到去年的高位就賣盤湧現，見高回吐，造出雙頂。如果好多隻標普成份股都係咁，結果就會將標普拖入同一個雙頂模式，萬一見頂回吐，有可能有10%至15%的調整幅度。佢話杜指的運輸指數已率先回吐，如今比高位低3%以上，運輸指數應該領先市場，這個動向令人有點擔心。
另一交易員JJ Kinahan也有擔心，話反映中小型股走勢的羅素500指數雖然仍向上，但成交愈來愈少，已愈來愈少人有睇好的雄心。
睇走勢有隱憂，目前最難睇係2月底歐洲央行放水和3月美國聯儲局開會可能QE3的影響，呢啲咁不正常因素，會否扭轉市場的慣性，令走勢分析無效，真係好難講。
陸羽仁